A saída terá lugar na igrexa de Crecente. Desde alí realizaremos unha parte importante do PR-G 174, iniciando o percorrido polo núcleo urbano para, a continuación, incorporarnos a varios tramos de levadas.

O itinerario levaranos ata a Capela do Cruceiro Quebrado, desde onde retomaremos o percorrido polas levadas durante varios quilómetros. Continuaremos ascendendo ata chegar ao miradoiro do Coto da Cruz, punto desde o que iniciaremos o descenso por diferentes levadas ata alcanzar o río Ribadil.

Seguiremos o curso do río pola súa marxe esquerda ata cruzar a ponte de Noceifas. A partir deste punto, continuaremos pola marxe dereita, percorrendo o río ata chegar ao Pozo do Inferno.

Desde o Pozo do Inferno iniciaremos o tramo final do percorrido, que nos levará de novo ata o punto de partida, na igrexa de Crecente.